Erindrekar

Námskeiðið fjallar um hvernig erindrekar (e. AI agents) virka og hvernig þeir eru smíðaðir.
Erindrekar taka við markmiði, ákveða sjálfir næstu skref og vinna verkið með þeim verkfærum og gögnum sem þeir hafa aðgang að. Farið er yfir muninn á erindrekum og spjallmennum, hvaða verkefni henta erindrekum og hvernig þeim eru sett hlutverk, fyrirmæli og öryggismörk.
Nemendur læra að tengja erindreka við verkfæri, gögn og ólík kerfi, prófa þá og lagfæra. Nemendur smíða tvo til þrjá erindreka sem sinna hver sínu verkefni og loks yfir-erindreka sem stýrir hinum og útdeilir til þeirra verkefnum.

Erindrekar: smíðaðu þitt eigið gervigreindarteymi
Notar þú ChatGPT, Claude, Gemini eða önnur gervigreindarverkfæri reglulega og vilt komast lengra?
Þá er næsta skref að láta gervigreindina ekki aðeins svara, heldur líka vinna verkin.Erindrekar (e. AI agents) taka við markmiði, ákveða sjálfir næstu skref og vinna verkið með þeim verkfærum og gögnum sem þeir hafa aðgang að.
Á þessu hagnýta fjögurra klukkustunda námskeiði lærir þú hvernig erindrekar virka og smíðar þitt eigið teymi. Unnið verður með Claude og Codex. Á námskeiðinu er byggt upp lítið teymi erindreka sem eru látnir vinna raunveruleg verkefni. Settur er upp yfir-erindreki sem stýrir teyminu og útdeilir verkefnum til annarra erindreka. Annar erindreki hefur það hlutverk að yfirfara vinnuna.
Þú átt aðallega í samskiptum við yfir-erindrekann, setur honum markmið, metur niðurstöðurnar og stýrir framhaldinu. Þú lærir líka að gefa erindrekum viðeigandi samhengi og vista leiðbeiningar, svo hægt sé að halda áfram með sama teymi síðar. Þú færð svo tíma til að prófa teymið þitt og þróa það áfram og ferð heim með eitthvað sem þú getur byggt á. Þátttakendur skoða líka tengingar við ólík kerfi sem hjálpa erindrekum að vinna verkin og hvernig þau eru tengd með MCP. Þau sem vilja geta svo fylgt sömu skrefum og prófað tengingarnar.

Að námskeiði loknu getur þú:

• útskýrt hvernig erindrekar virka og hvað greinir þá frá spjallmennum

• metið hvaða verkefni henta erindrekum og hver ekki

• gefið erindrekum skýrt hlutverk, fyrirmæli og viðeigandi samhengi

• vistað leiðbeiningar og haldið áfram með sama teymi síðar

• smíðað lítið teymi þar sem yfir-erindreki stýrir og annar erindreki yfirfer vinnuna

• prófað erindreka, lagfært þá og sett þeim skýr mörk

• metið niðurstöður teymisins og stýrt framhaldinu

• útskýrt hvernig erindreki er tengdur við önnur kerfi

Fyrir hverja?
Námskeiðið er ætlað fólki sem er vant að vinna með gervigreind, til dæmis ChatGPT, Claude eða Gemini, en hefur ekki smíðað erindreka áður. Það hentar ekki byrjendum í notkun gervigreindar. Forritunarkunnátta er ekki skilyrði.

Undirbúningur og búnaður
Þátttakendur þurfa að mæta með:

• fartölvu

• greidda áskrift að að minnsta kosti öðru af tveimur kerfum: Claude (Pro eða hærri) eða ChatGPT (Plus eða hærri), en Codex fylgir ChatGPT-áskrift

Þátttakendur fá sendar leiðbeiningar um uppsetningu fyrir námskeiðið. Gerð er krafa um að uppsetningu sé lokið og að allt sé tilbúið þegar námskeiðið hefst.
Gott er að koma með hugmyndir að verkefnum úr eigin starfi sem þú vilt láta erindrekateymið vinna.