Vinnustaðanám

Nám í rafiðnaði er skipt í vinnustaðanám og nám í skóla. Tilgangur vinnustaðanáms er að efla þekkingu, færni og skilning nema á verkþáttum námsins. Að loknu vinnustaðanámi og skóla á neminn að hafa öðlast þá færni sem þarf til að standast sveinspróf.

Að loknum tveimur önnum í grunnnámi má hefja vinnustaðanám. Námssamninga eða rafræna ferilbók skal gera í upphafi vinnustaðanáms og ekki seinna en mánuði eftir að vinna hefst hjá meistara í faginu.

Nemendur verða að vera orðnir 16 ára til að mega fara á námssamning og hafa lokið 2 önnum í grunndeild rafiðnaðar.

Námssamningur eða ferilbók

Nemar sem hófu nám eftir ágúst 2021 falla undir nýja reglugerð um vinnustaðanám þar sem ferilbók tekur gildi í stað námssamninga.

• Rafræn ferilbók er að taka við af námssamningum og mælt er með að nemar nýti sér hana í vinnustaðanámi. Hún er byggð á hæfni frekar en tímalengd.

• Námssamningar eru ýmist 30 vikna starfsþjálfunarsamningur eða 48 vikna samningsbundið iðnnám.

• Nemar í rafvélavirkjun og rafveituvirkjun halda áfram að gera námssamninga í sínu vinnustaðanámi.