Loxone hússtjórnarkerfi – Uppsetning og forritun (Grunnnámskeið)

Lýsing

Loxone er öflugt hússtjórnarkerfi sem nýtist til sjálfvirknivæðingar í íbúðarhúsnæði, atvinnuhúsnæði og opinberum byggingum. Með kerfinu er hægt að samþætta lýsingu, hitun, gluggatjöld, loftræsingu, aðgangsstýringu, hljóðkerfi, orkustjórnun og fjölmörg önnur tæknikerfi í eina heildstæða lausn.

Á þessu fjögurra daga grunnnámskeiði fá þátttakendur hagnýta og verklega þjálfun í uppsetningu, forritun og gangsetningu Loxone kerfa. Unnið er með raunhæf verkefni þar sem þátttakendur setja upp kerfi frá grunni, forrita virkni og sannreyna lausnir í verklegu umhverfi.

Námskeiðið er kennt samkvæmt viðurkenndu kennsluefni Loxone og er ætlað þeim sem vilja öðlast traustan grunn til að vinna með kerfið í atvinnuskyni.

Markmið

Að námskeiði loknu geta þátttakendur:

• Skilið uppbyggingu og virkni Loxone kerfisins.

• Sett upp og tengt Loxone Miniserver og helstu stækkunareiningar.

• Hannað og forritað grunnvirkni í Loxone Config.

• Sett upp og stillt lýsingu, hitastýringu, gluggatjöld og orkustjórnun.

• Unnið með inntök, úttök, skynjara og stýrieiningar.

• Framkvæmt gangsetningu og grunnbilanagreiningu.

• Undirbúið kerfi fyrir afhendingu til notenda.

Markhópur

Námskeiðið er ætlað:

• Raf- og rafeindavirkjum.

• Kerfishönnuðum.

• Verk- og tæknifræðingum

• Tæknimönnum sem starfa við hússtjórnarkerfi og sjálfvirknilausnir.

• Öðrum sem vilja afla sér grunnþekkingar á Loxone.

Forkröfur

Æskilegt er að þátttakendur hafi:

• Grunnþekkingu á raflögnum og rafkerfum.

• Almenna tölvukunnáttu.

• Grunnþekking á IP-netkerfum er kostur en ekki skilyrði.

Innihald

Á námskeiðinu verður meðal annars farið yfir:

• Uppbyggingu Loxone kerfisins.

• Loxone Miniserver.

• Extension- og Tree-einingar.

• Air-einingar og þráðlaus samskipti.

• Tengingu skynjara og stýribúnaðar.

• Loxone Config.

• Verklega forritun.

• Lýsingarstýringar.

• Hitastýringar.

• Gluggatjöld og sjálfvirka skyggingu.

• Orkustjórnun.

• Tímastýringar og sjálfvirkni.

• Aðgangsstýringar.

• Loxone App og notendaviðmót.

• Gangsetningu, prófanir og afhendingu kerfis.

• Grunnbilanagreiningu.

• Bestun aðferða við hönnun og uppsetningu.

Kennslufyrirkomulag

Kennslan byggir á fyrirlestrum, sýnikennslu og umfangsmiklum verklegum æfingum þar sem þátttakendur vinna sjálfir að uppsetningu og forritun kerfisins.

Námsmat

Ekki er um formlegt próf að ræða. Þátttakendur vinna verkleg verkefni sem byggja á því efni sem farið er yfir á námskeiðinu.

Námsgögn

Kennslugögn eru innifalin og þátttakendur fá aðgang að viðurkenndu kennsluefni frá Loxone. Í námsgjöldum er innifalin þátttaka í Foundation Training-grunnþjálfun Loxone, auk Demo Case — sýnikennslutösku með helsta búnaði.

Mælum með nemendur noti sínar eigin tölvur á námskeiðinu, nemendur þurfa að setja upp Loxone Config 17 sem nálgast má á eftirfarandi slóð: https://www.loxone.com/enus/support/downloads/
Rafmennt útvegar tölvu fyrir þá sem þess þurfa.

Viðurkenning

Við lok námskeiðs fá þátttakendur staðfestingu á þátttöku samkvæmt reglum LOXONE.

Dagskrá

Fjögurra daga námskeið með verklegum æfingum á kennslutösku.

Loxone Silver Partner vottun  

Að loknu námskeiði fá nemendur Silver Partner vottun frá Loxone sem veitir aðgengi að meira ítarefni um búnað og uppsetningar ásamt því að fá búnað á betri kjörum.

Athugasemdir

Þau sem eiga tösku og vilja fá Loxone Silver Partner vottun býðst námskeiðið á töluvert lægra verði eða frá 11.990 kr. Vinsamlegast hafið samband við Rafmennt ef svo ber við.

Gott að vita

Fyrirkomulag kennsli: Staðnám

Námsmat: Mætting og þátttaka í verkefnum

Tengiliður: Rúnar Sigurður

Ekki er hægt að nota gjafabréf á þessu námskeiði