CompTIA Network+ - Grunnur að netkerfum

Viltu öðlast hagnýta þekkingu á netkerfum og undirbúa þig fyrir alþjóðlegu CompTIA Network+ vottunina?

Á þessu námskeiði öðlast þú góðan skilning á uppbyggingu, virkni og öryggi tölvuneta. Þú lærir hvernig mismunandi netbúnaður vinnur saman, hvernig tölvusamskipti fara fram og hvernig greina má og leysa algeng vandamál í netkerfum.

Með verklegum æfingum og raunhæfum verkefnum færðu þjálfun í notkun greiningartóla, bilanaleit og öruggri uppsetningu netkerfa. Að námskeiði loknu hefur þú öðlast hagnýta færni sem nýtist í daglegu starfi og traustan grunn til frekara náms í upplýsingatækni, svo sem CCNA og netöryggi.

Traustur grunnur í netkerfum og undirbúningur fyrir alþjóðlegu vottunina CompTIA Network+.

Um námskeiðið

Þetta fjölbreytta og hagnýta námskeið er ætlað öllum sem vilja öðlast traustan grunn í netkerfum og undirbúa sig fyrir alþjóðlega vottun CompTIA Network+. Námskeiðið hentar sérstaklega þeim sem vilja öðlast víðtækan skilning á netkerfum, greina og leysa vandamál og vilja starfa við netkerfi eða styrkja færni sína til frekara náms í upplýsingatækni, s.s. CCNA eða netöryggisgreinum.

Markmiðið er að nemendur skilji hvernig tölvusamskipti fara fram yfir net og öðlist djúpan skilning á samskiptum milli netbúnaðar – t.d. leiðarstjóra (routers), skipta (switches) og netþjóna (servers). Þeir sem ljúka námskeiðinu með góðum árangri verða færir um að greina og leysa algeng vandamál í netkerfum og vísa flóknari málum í réttan farveg. Þá eru nemendur einnig hvattir og búnir undir það að afla sér frekari þekkingar á eigin forsendum.

Eftir námskeiðið ættu nemendur að

• Hafa þekkingu á mismunandi netbúnaði og hlutverki hvers tækis

• Geta skilið og teiknað upp netkerfi á mismunandi lögum (OSI-módel)

• Þekkja helstu öryggishættur og hvernig ber að bregðast við þeim

• Hafa góðan skilning á virkni algengra netkerfa og geta leyst úr algengum vandamálum

• Þekkja og nota helstu nettól og prófunartækni, þar með talin DNS, DHCP, ping, traceroute o.fl.

• Geta greint og tengt netbúnað, þar á meðal búa til eða prófa netkapla

Kennsluaðferðir og áherslur

Námið byggir á fyrirlestrum, heimalærdómi og verklegum æfingum í hermum. Áhersla er lögð á öfluga hagnýta þjálfun, öryggismál í netkerfum, og vönduð vinnubrögð sem nýtast í daglegu starfi. Námið nýtir viðurkenndar enskar kennslubækur og námsefni og er kennt af reyndum sérfræðingi úr netgeiranum – þannig eru verkefni og dæmi ávallt í takti við raunveruleikann.

Kennslustundir verða teknar upp, þátttakendum gefst því kostur að rifja upp tíma, horfa á fyrirlestra sem þeir hafa misst af og jafnvel tekið hluta eða allt námið í fjarkennslu.

Meðal námsgagna sem nemendur fá afhent er bókin „CompTIA Network+ Certification Kit: Exam N10-009".

Þetta námskeið hentar einstaklega vel sem grunnur að námskeiði í Cisco Certified Network Associate – CCNA, sem áætlað er að bjóða upp á vorönn 2027.

Aðrar upplýsingar

Forkröfur: Almenn tölvufærni

Lengd námskeiðs: 40 klst.

Dagskrá

Kennt er á þriðjudögum og fimmtudögum kl. 17:00–21:00